पूजा जिज्ञासु

गजल

ब्वाँसा र स्याललाई साँच्चै लघार्न सक्छ

आए युवा निरङ्कुश,सरकार हार्न सक्छ

 

जस्ले सहन्छ पीडा,सुनले सहे जसरी,

आकार पाइ उसले,जीवन सपार्न सक्छ

 

सम्भव हुँदैन के पो,ईच्छा र आँट राखे,

यसले त वालुवामा,पीपल उमार्न सक्छ

 

ढुङ्गा बनेर बाँचे,डुब्छौ अवश्य डुब्छौ,

भै हेर फूल जस्तै,जलले नि तार्न सक्छ

 

रुखबाट घाँस जसले,झार्दैन हेर घरमा,

ऊ प्यारमा गगनको,त्यो जून झार्न सक्छ

पूजा जिज्ञासु

मुजाजे मुसम्मन अखरब